《「死掉是一件很可怕的事嗎？」不，死不掉才是》
好耐之前tvb曾經做過一個劇集《衝上人間》，套劇講述張可頤意外死後，上到天堂嘅奇遇，其中一幕我幾深刻， 張可頤嘅一個朋友用紙親手摺咗碟蝦，再燒畀張可頤，張可頤即時就收到，就好似而家你用whatsapp send張相畀朋友一樣咁快。當時一個十歲學生因為睇咗呢套tvb劇集之後，覺得死後嘅世界非常有趣，死後精神原來係存在，於是跳樓自殺身亡，最後TVB 因為輿論壓力，將劇集刪減，個次係少有將生死議題喺公眾層面上討論。
今日行過無印良品，見到一本日本翻譯過嚟嘅圖文故事書，書名叫做《爺爺的天堂筆記本》，作者係吉竹伸介，呢本書係講述爺爺想像天堂嘅景象，作者係以一個非常幽默 嘅手法，去表達佢對於死後世界嘅想像。本書用左一條問題做引旨──死掉是一件很可怕的事嗎？
呢本書真係非常有創意....我睇睇下真係覺得笑中有淚.....
作者想像做壞事嘅人一定會落地獄，佢就幻想地獄嘅情景。作者話做壞事嘅人，應該每日都要被逼做 暖身操，地獄一定周圍都係人逼逼，廁所得一隔，於是要忍屎，環境好臭。落地獄之後，無論做乜嘢都會畀人鬧，每晚仲要聽悲傷嘅故事，地獄嘅制服仲要濕笠笠而且吉肉嘅.....
大家覺唔覺得作者講緊我地香港人過緊嘅生活呀？
我哋每朝都好似萬里長征咁人逼人搭地鐵巴士，經過地鐵站，你會見到動物大遷徙咁多人，然後太多人太多汗，於是周圍都好臭。你返屋企，又係一家N 口等一隔廁所用，去商場，又係大排長龍，每次排排下都好想放棄。尋日八號風球，今日紅雨 落狗屎，你有冇淋到隻鞋濕曬up住對腳搭車？然後返到公司又up 住吹殮房咁凍嘅冷氣。每日返工無論做乜嘢都會畀人鬧 ，放工坐一坐關愛座又會畀人鬧。而且我哋唔只夜晚會聽到悲傷嘅故事，由朝到晚都會聽到悲傷嘅故事。
******************
之前一個朋友同我講，佢一個uncle因為高血壓同高膽固醇，一向都有睇開政府嘅專科醫生。最近一次覆診嘅時候，醫生話因為病情已經好轉，可以減返少少藥。但個uncle 好驚俾人cut 藥，cut cut 下就會俾人close file...
好多人驚比人close file，都不停強調自己未好返，呃醫生同以前一樣，病情都係咁嚴重。 因為冇人想喺政府醫院專科個list 度被人移除，想keep 住睇政府專科。
原來我哋已經去到一個大家鬥病鬥窮鬥可憐嘅時代喇.....你一旦唔夠病唔夠窮唔夠可憐， 你就會被社會嘅福利制度遺忘同捨棄。公屋如是，醫療福利如是，學位如是.....
然後你明白到，喺香港人又多，資源又短缺嘅情況之下，其實死掉真係唔係一件可怕嘅事，死唔去先係最可怕嘅事......
Search